युनिकोड
पात्रो
शुक्रवार, आश्विन ३० गते २०८३
क्षणिक आवेगको मूल्य
शुक्रवार, चैत्र २७ २०८२०८:०२
पाटनको भीडभाडयुक्त कृष्ण मन्दिर क्षेत्र बुधबार साँझ एक दर्दनाक घटनाको साक्षी बन्यो। सामान्य गलत फोनकलबाट सुरु भएको विवादले दुई सहोदर दाजुभाइको ज्यान लिएको छ।
झापा घर भई ललितपुरको इमाडोलमा बस्दै आएका ३३ वर्षीय सुमित नेम्वाङ र २५ वर्षीय सिर्जन नेम्वाङमाथि छुरा प्रहार हुँदा दुवैको मृत्यु भएको हो। गम्भीर घाइते भएका उनीहरूलाई तत्काल ग्वार्कोस्थित बीएन्डबी अस्पताल पुर्याइए पनि चिकित्सकले मृत घोषणा गरेका थिए।
प्रहरीका अनुसार, सुमितले साथीलाई फोन गर्ने क्रममा गलत नम्बर डायल भएपछि अपरिचित व्यक्तिसँग भनाभन सुरु भएको थियो। सोही विवाद बढ्दै जाँदा ‘भेटेरै कुरा गरौँ’ भन्ने सहमतिमा दुवै पक्ष मंगलबजार पुगेका थिए।
बेलुका करिब साढे ७ बजे कृष्ण मन्दिर अगाडि भएको भेटघाट केही समयमै झगडामा परिणत भयो। सो क्रममा ललितपुर महानगरपालिका–९ का ३२ वर्षीय सञ्जीव नेपालीले साथमा रहेको छुरा प्रहार गर्दा सुमित गम्भीर घाइते भए। उनलाई बचाउन अघि बढेका भाइ सिर्जनमाथि पनि छुरा प्रहार भएपछि दुवै ढलेका थिए।
घटनापछि प्रहरी तीन मिनेटमै घटनास्थल पुगेको र घाइतेलाई अस्पताल पुर्याइएको भए पनि उनीहरूको ज्यान जोगाउन सकिएन। प्रहरीले सञ्जीव नेपालीलाई घटनास्थल नजिकैबाट छुरासहित पक्राउ गरेको छ भने उनका सहयोगी गगन सुनारलाई पनि नियन्त्रणमा लिइएको छ।
प्रारम्भिक अनुसन्धानमा यो घटना पूर्व वैमनस्यताभन्दा पनि क्षणिक आवेग र झगडाको परिणाम भएको देखिएको प्रहरीले जनाएको छ।
मनोचिकित्सकहरूका अनुसार, अत्यधिक रिस र आवेग नियन्त्रण गुम्दा मानिसले परिणाम नसोची गम्भीर निर्णय लिन सक्छ। यस्तो अवस्थालाई समयमै नियन्त्रण गर्न सके यस्ता दुखद घटना टार्न सकिने उनीहरूको सुझाव छ।
यस घटनाले सानो विवादले समेत भयावह रूप लिन सक्ने देखाउँदै समाजलाई संयम, सहिष्णुता र संवादको आवश्यकता झन् बढेको सन्देश दिएको छ।
Be the first to comment!
© 2026 All right reserved to rastrakhabar.com
Site BY Sobij
ताजा
लोकप्रिय
प्रतिक्रिया दिनुहोस