सोमवार, आश्विन २६ २०८३१२:०९
यमनका इराननिकट हुथी विद्रोहीले साउदी अरबका विभिन्न विमानस्थललाई निशाना बनाउँदै आक्रमण तीव्र पारेका छन्। पछिल्लो एक सातामा साउदी अरबका पाँच विमानस्थलमा कम्तीमा १० पटक आक्रमण भएको अन्तर्राष्ट्रिय सञ्चारमाध्यमहरूले जनाएका छन्।
राजधानी रियादस्थित किङ खालिद अन्तर्राष्ट्रिय विमानस्थलमा सबैभन्दा बढी आक्रमण भएको छ। पूर्वी सहर दमामस्थित किङ फहद अन्तर्राष्ट्रिय विमानस्थल तथा साउदी अरबको प्रमुख तेल कम्पनी अराम्कोका केन्द्रसमेत निशानामा परेको हुथी समूहले दाबी गरेको छ।
अन्तर्राष्ट्रिय समाचार संस्था रोयटर्सका अनुसार आइतबार रियाद विमानस्थलको टर्मिनल ४ मा भएको आक्रमणमा एक जनाको मृत्यु भएको र ११ जना घाइते भएका थिए। त्यसको अघिल्लो दिन शनिबार भएको आक्रमणमा साउदी अधिकारीहरूले १३ जनाको मृत्यु र ३०० भन्दा बढी घाइते भएको बताएका थिए। एक साताभित्र रियाद विमानस्थलमा भएका आक्रमणमा मृत्यु हुनेको सङ्ख्या १८ पुगेको रोयटर्सले जनाएको छ।
हुथी विद्रोहीले आक्रमणको जिम्मेवारी लिँदै यात्रु, विमान कम्पनी र विमानस्थलका कर्मचारीलाई साउदी अरबका विमानस्थल प्रयोग नगर्न चेतावनीसमेत दिएका छन्। यसले हवाई सेवा, यात्रु सुरक्षा र क्षेत्रीय यातायात व्यवस्थामा थप चुनौती सिर्जना गरेको छ।
यसैबीच, साउदी अरबले हुथी विद्रोहीविरुद्ध यमनमा हवाई आक्रमण तीव्र पारेको छ। अनादोलु समाचार संस्थाका अनुसार अक्टोबर ५ देखि ११ सम्मको अवधिमा रियादको किङ खालिद अन्तर्राष्ट्रिय विमानस्थलमा पाँच पटक, दमामको किङ फहद अन्तर्राष्ट्रिय विमानस्थलमा दुई पटक तथा अभा, जिजान र नजरानका विमानस्थलमा एक–एक पटक आक्रमण भएको विवरण सार्वजनिक भएको छ।
लगातार भइरहेका आक्रमण र प्रत्याक्रमणले साउदी अरब र यमनबीचको सुरक्षा तनाव थप बढाएको छ। विमानस्थल र तेल पूर्वाधारलाई लक्षित गरी भइरहेका घटनाले नागरिकको सुरक्षा तथा क्षेत्रीय स्थायित्वमाथि गम्भीर प्रश्न खडा गरेको छ।
Be the first to comment!
© 2026 All right reserved to rastrakhabar.com
Site BY Sobij
युनिकोड
पात्रो
ताजा
लोकप्रिय
प्रतिक्रिया दिनुहोस