विशाल भण्डारीले निर्देशन गरेको टेलिभिजन कार्यक्रम ‘कमेडी नाइट विथ च्याम्पियन’ मा एमाले सचिव महेश बस्नेतलाई अतिथि बनाइएपछि कार्यक्रमको सह–प्रायोजक होन्डा कम्पनीले हात झिकेको छ।

कार्यक्रममा बस्नेतलाई बोलाइएपछि होन्डाले यसबारे चासो व्यक्त गर्दै उक्त एपिसोड प्रसारण नगर्न आग्रह गरेको बताइएको छ। तर कार्यक्रम प्रसारण भएपछि होन्डाले कार्यक्रमसँगको सम्झौता तोड्दै सह–प्रायोजनबाट बाहिरिएको स्रोतले जनाएको छ।

नेपाली टेलिभिजन कार्यक्रमको इतिहासमा प्रायोजकले यसरी कार्यक्रम छाडेको घटना दुर्लभ मानिएको छ।

कार्यक्रमका निर्देशक विशाल भण्डारीले भने आफूहरूले कुनै पनि अतिथिलाई उनको दल वा राजनीतिक विचारका आधारमा होइन, व्यक्तित्वका आधारमा बोलाउने गरेको दाबी गरेका छन्।